Gedichte

Mundart (i mim fau Bärndütsch), isch d Sprach vo üsne Gedanke.

Wiso auso nid schribe wasme däicht u zwar so wi me däicht ?

Gedanke macht me sech ja houptsächlech um die Sache, wo rund um üs passiere, wome mitt's drinne steit. Für mi si das im Momänt Begäbeheite usem Autag vom Buurläbe. 

D Siuberdischtle nimeni aus Symbou für miner Gedicht

Heimatverbunde, Bodeständig, Aspruchslos, aber Vorsicht, es sticht.

                                                                       Theres Gerber

Zahle

Langsam wirde y zum Zahlehasser,

es düechtmi es wärd geng no krasser.

Aus wird erfasst, berächnet u erhobe,

Zahle wärde übertreit, i treit u verschobe.

E ryse Büroapperat,

macht jede Morge sich parat.

Sy töggele uf de Taschte,

hufe Zahle i Comiuterchaschte.

Mit Zahle chöme d'Fakte uf e Tisch,

obs guet louft oder unrentabu isch.

Machsch ou mit Härzbluet diner Sache,

ersch Zahle säge obs duesch richtig mache.

E Politiker wo nid mit Zahle cha depatiere,

duet Diskusion gar schnäu verliere.

Was us dim Verstand du seisch,

gloubt Niemer, wend nid Zahle häre leisch.

Nume was berächnisch zautsech us.

Wär nid rächne chunt nid drus.

Isch öpis nid ganz klar,

e Statistik machts asichtbar.

Zum Glück gits Lüt wo dür ds Läbe wandle,

wo nach em Härze u nid na de Zahle handle.

Härzlechi Begägnige gä üsem Läbe Sinn,

u bringe ersch dr richtig Gwinn.

D'Agrarpolitik

D'Agrarpolitik isch es Desaster,

machsch nid mit, de fäuts am Zaster.

Erfahrige chasch vergässe,

mit Studie wird hüt gmässe.

Was vom Vater no hesch glehrt,

das isch hüt doch aus verchert.

Nid dert wo d'Mäier summe,

nei, im Büro wird bestumme.

Näbst Natur u Wättergwaute,

muesch di a d'Vorschrifte haute.

Irgendöpis louft da schlächt,

ha gmeint sig Buur u nid dr Chnächt.

Für jedi Handlig,isch doch klar,

bruchsch sofort es Formular.

Wirsch säuber bau zum Bürolischt,

derwile steit haut d'Chue im Mischt.

Mängisch

Mängisch isch guets Wätter schlächt

u schlächts Wätter guet.

Mängisch giengsis besser,

wesis schlechter gieng.

Mängisch si di Ryche ermer aus di Arme

u di Arme rycher aus di Ryche.

Mängisch isch nid Jede wo elei isch einsam

u nid Jede wo einsam isch, isch elei.

Mängisch isch weniger meh

u mängisch isch viu no zweni.

Früsch Duschet

Oh je, wi gseni afe dry

u schmöcke tueni ou echli.

Drum muesi itze sofort is Bad.

Ds Wasser het grad no gnue Grad.

Nes Aprikosepeeling uf ds Gsicht massiere.

Ne Öpfuhaarkuur i d'Frisur iche schmiere.

De ab ungere warmi Duschistrau,

vor Jogurtduschgreme schumets überau.

Abspüele, dröchne u de zum Lohn,

aues schön gremele, mit Haferkeimemulsion.

Fertig mit em gschmack nach aute Söcke,

wiu i itz nach Birchermüesli schmöcke.

Adväntszyt

Dr Husigang dekoriere

U dr bi ad Finger friere 

Härzegi Adväntskaländer

glänzegi Lamettebänder

Wiehnachtslieder gsang

Musig u Glogge klang

Güetzi bache

Päckli mache

Ängeli u Cherzeschy

Dr Samichlaus chunt ou verby

Manderine, Nuss u Schoggibatze

Am Voguhus da stritte d Spatze

Düre Wiehnachtsmärit loufe

No di letschde Gschänkli choufe

Läbchueche garniere

Glüewy degustiere

Adväntzchranz binde

Wiehnachtsböimli finde

Schneematsch i de Gasse

Längi Schlange a de Kasse

Wiehnachtschugle grüen u blau

Ds Jesuschindli dert im Stau

Liechterchötti

Ds Gschänk vom Götti

Märli verzeue 

Festagsmenü bsteue

U de no es Chrippespiu

Itz wirds mer auso dsfiu

Langsam geitmer us dr Schnuf

Wiehnachtsstimmig chunt nid uf

De ersch weni chli i my cha gah

Chunt d'Wiehnacht ou im Härze ah

22.01.2018    Theres Gerber